USIPITWE NA HII STORY - CHAMA CHA WALIMU ( CWT) MWENDO MDUNDO

Chama cha walimu wilayani Namtumbo mkoani Ruvuma kimeanza safari ya kutoa semina kwa walimu wa kike wa wilaya hiyo kuhusiana na mambo mbalimbali yanayohusu  haki za wanawake kulingana na katiba ya jamhuri ya muungano wa Tanzania.

 

Semina hiyo ilifanyika katika ukumbi wa halmashauri ya wilaya ya Namtumbo ambapo katibu wa chama cha walimu wa wilaya ya Namtumbo Bi.Estha Chabruma aliwasilisha mada mbili ambazo ni mada ya mirathi na mada ya ujasiliamali kwa walimu wa kike.

 

Akielezea kuhusu mada ya mirathi katibu wa chama huyo aliwataka walimu hao kuwa makini katika kuzijua sheria za mirathi kwa kuwa  wanawake wengi ambao hawajui haki hizo hunyanyaswa na kuhangaika na mzigo wa familia aliyoachiwa na marehemu mumewe kutokana na kutopata hakistahiki za mirathi hiyo.

 

Aidha alitaja sheria  za mirathi kwa mujibu wa katiba ya jamuhuri ya muungano wa Tanzania kuwa zipo tatu ambazo ni sheria ya mirathi ya kiserikali,sheria ya mirathi ya kimila na sheria ya mirathi ya kiislamu.

 

Hata hivyo alifafanua sheria ya mirathi ya kiserikali ( Indian succession Act 1865)ambapo mgawanyo wa mali unaenda kwa watoto wa marehemu ambao wanapatiwa theluthi mbili ya mirathi yote na wajane au wagane watapata theluthi ya miradhi yote na endapo hakuna watoto nusu ya mirathi watapewa wajane na nusu inayobaki watapewa ndugu wa marehemu.

 

Lakini pia katika sheria ya mirathi ya kimila mgawanyo wa mali za mirathi umewekwa katika madaraja  ambapo daraja la kwanza ni mtoto wa kiume wa kwanza kutoka nyumba ya kwanza na daraja la pili ni la watoto wa kiume waliosalia na daraja la tatu ni la watoto wa kike ambao kwa sheria za kuanzia mwaka 1999 watoto wa kike wametakiwa nao kupewa haki ya kurithi ardhi tofauti na huko nyuma.

 

Sheria ya miradhi ya kiislamu inaruhusu wajane kurithi moja ya nane ya mirathi yote kama wanawatoto  na watalazimika kuchukua robo ya mirathi kama mjane hakubahatika kupata mtoto na mali inayobaki hugawanywa katika mafungu matatu yaani theluthi mbili huchukuliwa na watoto wa kiume na theluthi huchukuliwa na watoto wa kike .

 

Mada nyingine iliyotolewa katika semina hiyo ilikuwa ya ujasiliamali ambapo walimu hao waliambiwa kuanza kujishugulisha na kuacha kuwa tegemezi hasa kwa kuanza  kidogo kidogo kujifanyia biashara na mwishowe kuondokana na utegemezi.

 

Mwalimu Fatuma Hassani akichangia mada ya ujasiliamali alisema kuwa walimu wengi wanapenda kujikwamua katika maisha lakini kinachowabana ni muda kwani kuanzisha biashara ni swala dogo lakini biashara inahitaji muda wa kutosha wa kusimamia ambapo wao muda rafiki kwao ni siku ya jumamosi na jumapili pekee.

 

Semina hiyo ilitolewa kwa walimu wa kike wa shule za msingi na sekondari za kata mbili ya Namtumbo na Rwinga na baada ya hapo semina itaendelea kwa kata zingine kadiri ya bajeti 
itakavyoruhusu. Na  Yeremias Ngerangera