Maaskofu Katoliki wamtaka Magufuli kutumia busara

BARAZA la Maaskofu Tanzania TEC, limemtaka Rais Dk. John Magufuli atende haki na atumie busara na akili   anapochukua hatua mbalimbali za utendaji zikiwamo za kupambana na ufisadi.

Kauli hiyo imetolewa   na Askofu Msaidizi wa Jimbo Katoliki la Bukoba, Method Kilaini kwa niaba ya TEC, alipozungumza na waandishi wa habari   Mwanza.

Askofu Kilaini na wenzake wako jijini Mwanza    kuhudhuria kongamano la tatu la  taifa la Ekaristi Takatifu litakalofanyika   kuanzia Juni 10 hadi 11 mwaka huu.

Akijibu maswali  ya waandishi wa habari kuhusu  utawala wa Rais Magufuli na matukio yanayojitokeza nchini, Askofu Kilaini amesema taifa lipo katika hofu.

Amesema ni  kutokana na matukio ya mauaji yanayofanywa na watu wachache waliokosa hofu ya Mungu na akataka matukio hayo yashughulikiwe kwa uzito unaostahili.

Hata hivyo kiongozi huyo wa kiroho alisema TEC haiwezi kutoa tathmini au kutoa maoni ya uongozi wa Rais Magufuli kwa sasa kwa sababu ni mapema mno.